[b]جوزك على متعوديه[/b]

تعالي انتي و هي هنا عندنا , لازم تعرفي تعاملي جوزك و تخليه زي الخاتم في صباعك و تعوديه علي طبعك كله طبوعة طبوعة , و لذا انا جيت و جبتلكم معايا شوية نصايح من اللي هي هي و لا أي أي و لا زي زي ..
النصيحة الاولي :-
ليلة الدخلة :- من ليلة الدخلة عرفيه مقامه و انه ملوش أي صلاحيات في البيت و يفضل انك تربيله الرعب من اول دقيقة , حتقولي ازاي؟؟ حقولك ازاي.. شوفي يا ستي اول متدخلو الشقة روحي اقفي عند السفرة طبعا هو حيجي وراكي , شدي كرسي و قوليله اقعد هنا عاوزة اقولك كلمتين و حاولي و انتي بتقولي كدة تكوني مبرقة و شكلك يخض , طبعا هو حيتخض و يقعد , لما يقعد قومي دوري حواليه و بصيله و اعملي زي الظابط اللي بيحقق مع متهم في قضية جاسوسية و قومي هابدة علي الترابيزة بايديكي و قوليله "عرفت كام واحدة قبلي؟؟ " و قبل ميفتح بقه بكلمة قوليله اوعي تكدب عليا انا ليا عيون في كل مكان و عارفة كل حاجة و لازم تعترف بجريمتك و الا ليلة اهلك مش معدية النهاردة .. غالبا مش حتحتاجي تقولي أي حاجة تانية لانه حيغم عليه الحقي بقي شوفيله الاسعاف و لا هاتيلوا كيلو بصل يشمه و اوعي تحسي بالذنب دة جزاته انه اتجرأ و اتجوزك.
النصيحة التانية:-
من اول مرتب يقبضه عوديه انك تاخدي منه كل الفلوس و حاسبيه علي السحتوت حساب الملكين و عوديه انه ياخد مصروف ايده منك و متعمليش حساب المواصلات .. المشي رياضة حتي لو كنتو ساكنين في حلوان (بعد ما ربنا كرمها و بقت محافظة و هو بيشتغل في المرج ( اللي لسة ربنا مكرمهاش ) , بس رأفة بيه اديله مصروف ايد جنيه و نص , الرحمة حلوة بردة ..... لا لا استني , معني كدة انه ممكن يقدر يعزم اصحابه علي عصير قصب و انتي عارفة طبعا الرجالة بيبوظوا بعض , كلمة من دا علي كلمة من دا يعصيه عليكي و لا حاجة , عموما احتياطي اديله ربع جنيه كفاية كدة تضمني انه ميقدرش يعزم اصحابه يعني اخره يشتري نص كوباية عصير قصب.
النصيحة التالتة :-
اوعي تغلطي الغلطة الشنيعة المريعة الفظيعة اللي بتغلطها ستات كتير مع اجوازتها .. اللي هي انك تسأليه عاوز تاكل ايه , اوعي كدة حياخد عليكي و مش حتخلصي .. شوفي انا حقولك انتي تطبخي اللي نفسك فيه , ملكيش نفس اتصلي بوالدتك اسأليها نفسها في ايه , ملقتيهاش , اتصلي بصاحبتك و اسأليها جوزها نفسه في ايه , ملكيش اصحاب .. انزلي اسألي البواب شوفيه عاوز ياكل ايه , معندكيش بواب اسألي الصيدلي اللي علي اول الشارع المهم اتصرفي و حاولي علي قد متقدري متطبخيش اكلة يكون بيحبها , الاحتياط واجب بردة.
النصيحة الرابعة :-
حاولي علي قد متقدري تقطعي علاقته بكل اصحابة ( استكمالا لنصيحة اتنين) يعني لو اتصل بيه صديق بالتليفون قوليله عاوز مين يا اخ هنا العباسية , يتصل تاني قوليه هنا المطافي , تالت هنا الاسعاف لحد مييأس و ميتصلش تاني .. اما اهمية الخطوة دي انه ممكن صاحبه يحكي معاه و يقوله مراتي بتعمل و تخلي و يعصيه عليكي , عشان كدة الاحتياط واجب و حاولي تعملي كدة مع اهله بردة .. عشان يبقي علي اديكي مقطوع من شجرة و ميلاقيش غيرك في وشة.
النصيحة الخامسة:-
اعملي كونترول علي الخروج انا بقولك اهو .. افرضي خد مصروفه و راح صرفه علي بنت مفعوصة من اياهم و طبعا البنت حتستغلها فرصة و تستنزف امواله , انتي عارفة الربع جنيه دة ممكن يجيب 5 ارغفة عيش في الزمن دة و محدش ياختي لاقي العيش .. خدي بالك كويس.
النصيحة السادسة:-
طبعا بعد مقطعتي عنه المية و الكهرباء مش حيلاقي غير البيت يقعد فيه , حولي تمنعيه من التليفزيون و الكاسيت و الكمبيوتر و الحاجات دي اللي بتبوظ الاجواز , كل ما يجي يشغل حاجة قوليله الكهربا الكهربا محدش قالك قبل كدة ان في فواتير كهربا بتيجي بالشئ الفلاني هو انت عشان مبتدفعش حاجة من جيبك (منتي معاكي المرتب بقي) و تقومي فاصلة الفيشة حتي لو كان كمبيوتر اوعي تعملي شات داون شيلي الفيشة علي طول , طبعا المرحوم جوزك مش حيلاقي حاجة قدامه غير شغل البيت يسليه و يضيع فيه وقته و اهو ينزاح من وشك.
و بكدة يا حبيبتي تقدري تعودي جوزك علي طبعك و تحققي السعادة الكاملة.

يا لهوي .. يا لهوي ...... جوزي بينده عليا ....... يخليكوا ليا اوعوا تقولوا علي الموضوع دة .... سلام بقي .